Omer Dilsoz

Omer Dilsoz

Piçekî ‘siyasî’ piçekî ‘edebî’!

Piçekî ‘siyasî’ piçekî ‘edebî’!

Li meydana Kurdistanê hê jî şîara “siyaset berkendal, edebiyat berpesar!” deng vedide. Ji ber wê jî, min xwest vê carê piçekî siyasî, piçekî edebî çavgeranekê li kawdan û pêşveçûnan bikim.

Serê pêşî;

Em hinekî rojevê binirxînin heval:)   

-Tirkiye, -ku bakurê Kurdistanê jî li xwe digire – di kûstana siyasetê de, li serê duçerxekê e; duriyana siyasî ya bi kort û kendal dihêle ku hevseng bi carê de serobinê hev bibin.

Li rexekî kasêtên bin navtengê yên doxînsistiya Cubbelî Ehmed li ser medyaya civakî (twitter û facebook) neqiş neqiş belav dibin ku ev wek encama “şerê navxweyî yê Cemaetên Tirk tê nirxandin”, ji aliyê dîtir pirsa Şîke û Sextekariya di Futbolê de ku tovê dubendiyê di navbera Serokomarî û Serokwezîrî de çand û wekî liqiyan û derizîna bircên AK Partiyê hate nirxandin, ji aliyekî dî ve li ber behs û gotina medyayê ye.       

Li ber çav e, ji zimanê meydaya tirk xuya ye ku di qewareya kurdî ya siyasetê de, pêngaveke nû li ber e û konsepteke taze tête vehûnandin.

Li ser hin malper û ajansan tê ragihandin ku hevdîtinên di navbera PKK û MÎTa Tirk de dîsa dest pê kirine.

Ji ber vê, hikûmetê bi hevdengiya CHP û MHPê qanûna daxistina cezayê ji şîkeya di sporê de ji parlamentoyê derxist.

Ev ceribandinek e. Heke bazara sûk û malê li hev hat, çavlê ye ku pêvajoya nû, li ser dikar û behsên girîngtir saz bibe û “efûyeke giştî” ya ji bo çekdarên PKKê dibe ku di çarçoveya gavên çareserkirin/tepeserkirina bizava kurdî de bête ber behs û guftûgoyê.        

Siyaset bi govenda “çep lêxe rast vegere” li ser sêla xwe dikele û kîjan alî, bi bername û vizyona xwe, bi proje û helsengrandina xwe destheltir/pratîktir be, xuya ye, ew ê zûtir û çêtir hespê xwe li meydana desthilatdariyê bibezîne.

Jixwe AK PARTÎya ku li ser stûnên lîberal û cemaetan, wekî derzinka xîjok pêl bi pêl, pêpeling bi pêpeling “taqiye”ya xwe rajortir dike û wekî pramîdekê xîmên xwe datîne û wekî axtepotekê (kêvjalê hesfserî) jî penc û lepên xwe di her derê re diçikîne.

Niha jî piçekî nava malê:

-Gava siyaset û kelvedana wê ya rojekê du danan ne wek hev, yekî ewrawî yekî sayî, hilmê li mirovî biçikîne, bêhemdê xwe mirov hinekî pirs û kêşeyên nava malê paşguh dike.

Mebesta min jê, meydana me ya edebî ye.

Vê payizê, hejmareke baş -ku qurtika didanên mirovî yên kursî bikaribe dagire- pirtûkên kurdî derketin, lê mixabin hêj gelek ji wan bi destê min neketine û min derfet nedîtiye ku wan bixwînim.

 Me ji meydayê seh kir ku weşangerên me bi Fuara Stenbolê ya meha borî kêfxweş bûne. Di qewareya xwe de wêjeya kurdî karîn û şiyan bi dest anîne ku hinekî dengê xwe bilindtir bike û xwendeyan bala xwe daye ser û pê re têkildar bûne.

Hejmareke hêjayî pûkepêdanê pirtûkên wêjeyî/edebî yên kurdî gihîştine ber destê xwendeyên kurd.      

-De bila bi ser xêrê be!

Önceki ve Sonraki Yazılar
YAZIYA YORUM KAT
UYARI: Küfür, hakaret, rencide edici cümleler veya imalar, inançlara saldırı içeren, imla kuralları ile yazılmamış ve büyük harflerle yazılmış yorumlar onaylanmamaktadır.
Omer Dilsoz Arşivi