Omer Dilsoz

‘Gamgam stile’ û wêjeya me

28 Ocak 2013 Pazartesi 18:24

Vê pêlê li her derê modeya reqs/dansa “gamgam stile”yê weke bayê kur bi çep tê û bi rast digumîne.

Babelîska ‘gamgam stile’yê vîzînî bi dol û newalên malperên civakî, medyaya sosyal û kanalên ragihandinê yên magazînê dixe û pif dike bin hingilên reytingan.

Taybetiya vê reqsê lotik û zîtikavêjiya wê ye ku weke golikê mêşqirtê pêvedayî lotikavêj xwe di cihê xwe nagire û li erd û asîmanan çu tebata wî nabe.

Vêca dirêj nakim,

Ji bo hûn bi xwe têbigihêjin ka ez dixwazim bibêjim çi, hema vê gavkê li hecî googlê ‘gamgam stile’ binivîsin, beşa videoyê nîşan bikin û xwe dadinê, hûn ê hin bibînin ku xuryanekê bi we girt û hûn bi çep û rastî bi kela bablekanê bi reqs û lotikan ketine jî.

Vêca, pirsa me û edebiyatê jî weha ye.

Piştî pirsên dûr û dirêj û berêkdanên di meydanên ‘hebû nebû’ de, pirsa nivîsîn û çawanivîsîna bi Kurdî; “qewareya vala û qebareya stûr an tenik, gundewarî an bajarî û berjêriyê” dey û dey hespê pênûsa me xwe berdaye deştekî dûz û pan diajo hay bavê min dajo…

Gelek qelemşûrê me reqsa “gamgam stile”yê bi peyv û peyna vî zimanî dikin û tirşika wê tînin ber devî û bi qewlê Culemêrgiyên me turîşka wê dertînin û şewqê babê lê dihejînin!

Cihê dilxweşiyê ye, her roja dibore ligel zêdebûna berheman, rexnegirên weke qelemtraşekê xwe di bejna berheman dişidînin, avê jê tînin û pê re ev verêja edebî ber bi geliyê pêşveçûnê ve gêr û hêl dibe.

Çûyîn, ber bi başiyê ye.

Her roj piçekî dî geş û ronîtir dibe.

Vêca em hemû niha dikarin bi stîla ‘gamgam stile’yê dadine govenda bablekanê û tozê ji meydanê rakin.

Wernê wernê wernê!

Bidin milan, bihejînin; tew teww teww!

Govendê xweş kin ez heyranî çavên we!...

Bu yazı toplam 10135 defa okunmuştur
Zimanê gel çiye?
 // Çatin Çortan
Ma ev nivîskar bi zimanê Ezmaniyan dinivîsin birayê an Xwişka "REXNE" ? tu him dibêji "naverok ne têr û tije, gellek qels e" û tu him dibêjî "nayê fêmkirin" ev nakokiyeke e.
Ma qey yên xelk û alema dinyayê giş ne wisa ye? zimanê edebiyatê edebî ye, bi xwendina pir jê tahm tê stendin. Gelo we heta niha çend pirtûkên kurdî xwendine ku hûn jê tahmê nastînin?...
20 Şubat 2013 Çarşamba 11:44
zimanê gel(MİŞ) ke?
 // serbest
keko, ewa tu dibêjî zimanê gel, -miş û düş e?

Heke 'kurdiya te têra nake û te xwe pêşve nebiribe' çi gunehê diavêjî stûyê nivîskaran?

camêr, şûjina çavên xwe nabîne, behsa dasiya çavên xelkê dike.......
01 Şubat 2013 Cuma 11:12
REXNE
 // sefkan amed
Birasti dema ku em li nivîskarên kurd dinêrin ji me re tişteki têr û tije nabêjin naverok gellek qelse û di heman demê de ji bi zimanekî dehl dinivisînin ziman ew kas girane ku meriv dinav de dernakevin daxwaza min ji we vî zimanê xwe hinek bervê zimanê gel bikşînin ku bila gel sûdekê ji we bigre....
31 Ocak 2013 Perşembe 11:20