Omer Dilsoz

Ber bi kî derê ve?

07 Mart 2013 Perşembe 12:16

A rast, min dil nebû li ser pêşveçûnan binivîsim.

Jixwe xwedanê kiryarê kiryara xwe, xwedanê biryarê biryara xwe û xwedanê gotinê gotina xwe dibêje îro.

A dimîne ser me, a qenc ew e, em hinekî ‘sebr’ bikin, bi bêhna fireh li benda pêşveçûnê bin.

Çi ko îro ‘tiştê gelekan dixwest pêk bê’ li ber e û alî berikên xwe dibin ber hev.

Îro maseyek hatiye danîn; Aliyek wê PKK û aliyê dî dewleta Tirk rûniştiye. Jixwe ji zû de diviya weha bûya; Yên şer dikin ew in û heke çareseriyek çêbe jî ew ê çêkin çi ko yê şerker çêtir dizane ka derdê wî çi ye.

A dikeve ber para me, heke gotin û giliyek me hebe; em ê jî bi riya nivîsê bizavê bikin wê derbirînin û bigihînin xwende û dilsozên vî zimanî.

A dimîne ber me, paletiya bo zimanekî ye ku bişên derbirînê di hiş û bîra wê bikin û hest û pestên xwe pê bidine rû.

A me, tenê nivîs e û ew e ku li welatê xwe em bişên ala vî zimanê ku kodên jêrehişa xwe ji Şaredewletên Huryanî digire û hişmendiya xwe li ser kelepûra avaker a dîroka çend hezar salî dinimîne û ava dike.

A dikeve ber me, ew e ku bo me çira û ronahiya vî zimanî her geş û rewneqdar bimîne û ‘ala kurdînî ya pîroz’ bi gotina Xanîyê xamehilgir, ‘li banê gerdûn’ bête daçikandin.

A me, ne gotin lê ji dil û hinavê ‘sotin’ e ku em bişên bi êzingên ruhê xwe tenûra kurdîniyê geş û şaryayî bihêlin ku ji genimê xaka Gutî û Lûlû, Med û Mîtaniyan nanê bi Kurdî bipêjin û zeviya azadiyê bi gîsnê Gamêşên li pey nemiriyê bireşînin.

A dimîne para me, ne biryar û xwe lê girtin û pêgiriya bi tevnên ku dê bêne raçandin e, lê a me çandina ruhekî azade, tovavêtina hizreke rizgariyane û avdana aqilekî mirovane –gerdûnhez, jiyanperêz, jîngehparêz, zayendparêz…- ye.  

Ji ber wê ez vê pêlê naxwazim serê xwe zêde bi ‘teorî’ û ‘komployan’ ve biêşînim.

Jixwe vê gavê ‘avê cihoka xwe vedaye û xuşoxuş diherike û verêj diçe.

Pirs bi a min divê ev be, “ev verêj ber bi kî derê ve ye?”  

Dirêj nakim, a ber min dikeve, ew e ku vê pêlê ez ji bo hemû senaryonên piştî zelalbûna vê ava şêlo bikaribim –em bikaribin- çirayê hêviya xwe netefînin û li ser piyan binînin.

Va ye, bihar tê û kifş e ku ev bihar dê gelekî bi liv û tevger be.

Konsepta nû, wê li me ferz dike ku em bi geş û gurtir zend û bendên xwe bişîdinin û xwedîtiyê li nirx û heyînên xwe yên ‘neteweyî’ bikin.

Bi taybetî jî ziman û dîsa ziman!

Ev pêvajo ber bi kî derê ve biçe jî divê em zimanê xwe nehêlin ber dîwaran sêwî û stûxwar û ragihêjinê û wî li bircên paşerojê bikine Keykuwas û ala azadiyê li ser bibaweşînin.

Îro, tenê tiştek dimîne bara me, divê em xwe ji bêxîretî û nezaniyê daweşînin.

Îro, di sêçerxa teng û çepûxarî de, divê em nexapin!

Bi kurt û kurmancî, şerê man û nemanê hê ji nû dest pê dike…     

Bu yazı toplam 3700 defa okunmuştur
pévajo
 // Welat Semsûr
keké ömer dilé pévajo yé kijan deré dixwaze bila ji wi ali de biçe. mina ku te got : em seré xwe bi teori u komployan neişinin. ger em li zimané xwe xwedi derkevin çi komplo nıkare viyana me bi dest xwe bixine. iro zimané me ji boy me buye dermané her tişti. em séwine dayika me zimané meye. em tarine ronahiya me zimané meye. dive ku em ji bi vi çavi li zimané xwe binérin....
09 Mart 2013 Cumartesi 22:57
bersiv
 // hawî gezaveti
Ji ber bersivandine sipas... ji ber bandora heremi an rezmana min a qels min got dive ber bi ku dere ve ya rast be..Min ev regez nizani bu.. ku dive pirtuken rezmane tevbidim.....
08 Mart 2013 Cuma 22:59
bo hawî
 // dilgeş
ber bi ku derê nabe, 'ku' nabe, 'kî' û 'kê' dibe, jixwe 'ku' awayê kelijî yê kî derê ye, a rastî, bûye kû... Tu dikarî weha bêjî; Ber bi KU. lê heke te DER jî xistê wê demê KUDER çênabe, KÎDER çêdibe. Koka peyvê, ber bi KÎJAN ERDÊ/DEVERÊ ye, ev kin bûye, ma ye KU, an jî KÎ DER......
08 Mart 2013 Cuma 12:55